«ВЕНСКИЕ КЛАССИКИ»: ВЕНАНЫҢ МУЗЫКАЛЫҚ ДӘСТҮРЛЕРІ ЖАС МУЗЫКАНТТАРДЫҢ ОРЫНДАУЫНДА
2026 жылғы 14 желтоқсанда Е. Рахмадиев атындағы Мемлекеттік академиялық филармонияның Концерт залында «Венские классики» симфониялық оркестр концерті өтеді.
Кеш шығармашылығы вена классикалық мектебінің дамуын айқындап, әлемдік музыкалық мұраның ажырамас бөлігіне айналған композиторлар – Вольфганг Амадей Моцарт пен Людвиг ван Бетховеннің музыкасына арналады. Концерттің ерекшелігі – вена классицизмінің тарихымен тығыз байланысты бай музыкалық дәстүрлері бар ел – Австрияда кәсіби білім алған жас қазақстандық музыканттардың қатысуы.
Бұл кеште дирижёрлік пульт басында скрипкашы әрі опера-симфониялық дирижёр, Рихард Вагнер атындағы Вена консерваториясының түлегі Жандос Мұхамеди өнер көрсетеді. Ол музыкалық білімін Күләш Байсейітова атындағы Республикалық қазақ арнаулы музыка мектеп-интернатында Нина Михайловна Патрушеваның сыныбында бастаған. Кейін Қазақ ұлттық өнер университетінде Тамара Яковлевна Карп пен профессор Раиса Қожабекқызы Мусаходжаеваның жетекшілігімен оқуын жалғастырды. Қазір Жандос Мұхамеди Венада опера-симфониялық дирижёрлық саласында шеберлігін шыңдап жүр. Ол Қазақстан мен Еуропаның музыкалық ұжымдарымен әріптестік жасайды, ал 2025 жылы Италиядағы Cilento халықаралық дирижёрлар байқауының бас жүлдесін жеңіп алды.
Кештің солисі – Ресей мен Австрияда кәсіби даярлықтан өткен скрипкашы Ерасыл Хамит. Ол Зальцбургтегі Моцартеум университетінде оқыды, қазір Вена музыка және орындаушылық өнер университетінде Вена филармониясының концертмейстері Альбена Данаилованың сыныбында орындаушылық шеберлігін жетілдіруде. 2026 жылдың қыркүйегінен бастап музыкант – Вена радиосы симфониялық оркестрінің (RSO Wien) әртісі. Оның шығармашылық өмірбаянында белгілі симфониялық және камералық ұжымдармен бірге өнер көрсету, халықаралық музыкалық фестивальдерге қатысу және әлемнің беделді сахналарындағы концерттер бар.
Кеш бағдарламасы вена классицизмінің әр қырын ашатын үш шығарманы біріктіреді.
Концерт Вольфганг Амадей Моцарттың «Фигароның үйленуі» операсына жазылған увертюрасымен ашылады – қуатқа, тапқырлыққа және театрлық серпінге толы шапшаң әрі ойнақы музыка. Алғашқы тактілерден-ақ ол тыңдарманды опера оқиғаларының ағынына тартып, мерекелік әрі қарқынды музыкалық әрекеттің әуенін айқындайды.
Людвиг ван Бетховеннің до мажор Бірінші симфониясы композитордың симфонист ретінде қалыптасуындағы маңызды кезең болды. Гайдн мен Моцарттың классикалық дәстүріне тән форманың айқындығы мен нәзіктігін сақтай отырып, Бетховен оған өз қуатын, күтпеген гармониялық шешімдер мен жарқын динамикалық контрастарды енгізеді. Бұл шығармада алдыңғы буын дәстүрлерін жалғастырып қана қоймай, өз музыкалық тілін танытуға ұмтылған жас композитордың даралығы айқын көрінеді.
Кештің шарықтау шегі – Людвиг ван Бетховеннің скрипка мен оркестрге арналған ре мажор концерті, op. 61 – скрипка репертуарының ең көрнекті туындыларының бірі. Онда солистің виртуоздығы лирикалық толғаныстың тереңдігімен және симфониялық ойлаудың ауқымдылығымен ұштасады. Скрипка партиясы орындаушыдан техникалық шеберлікпен қатар музыкалық форманы нәзік сезінуді, мәнерлілік пен ішкі еркіндікті талап етеді.
«Венские классики» концерті – Венаның музыкалық мұрасымен кездесу және еуропалық музыкалық дәстүрмен танысу кәсіби қалыптасуының маңызды бөлігіне айналған жас қазақстандық орындаушыларды тыңдау мүмкіндігі. Бұл кеште вена классицизмі дәуірінде туған шығармалар Австрияда өнер жолын жалғастырып жүрген, қазақстандық орындаушылық мектептің жаңа буынын танытатын музыканттардың интерпретациясында орындалады.
Өткеннің дәстүрлері жаңа үнге ие болатын ұлы классикалық музыка әлемінде кеш өткізуге шақырамыз!
14 желтоқсан | Е. Рахмадиев атындағы Мемлекеттік академиялық филармонияның Концерт залы
Бағдарламада:
В. А. Моцарт. «Фигароның үйленуі» операсына увертюра.
Л. ван Бетховен. № 1 симфония, до мажор, op. 21.
Л. ван Бетховен. Скрипка мен оркестрге арналған ре мажор концерті, op. 61.
Солист – Ерасыл Хамит (скрипка)
Дирижёр – Жандос Мұхамеди
Симфониялық оркестрдің көркемдік жетекшісі – ҚР халық әртісі Абзал Мұхитдин
